01:45 Xoves, 01 de Decembro de 2022
Terra e Tempo. Dixital Galego de pensamento nacionalista.

28-06-2013

Coa política económica do PP, avalada polo PSOE e outras forzas políticas, imos camiño de perder todos os nosos dereitos laborais

A dereita en estado puro

Valorar (0)

PAZ ABRAIRA SOBRADO



O Partido Popular e os seus máximos dirixentes mostran cada día con maior claridade as súas cartas. Como se dun xogo de naipes se tratase, xogan coas nosas vidas e barallan en partidas indecentes nas que o premio é arrasar cos dereitos das persoas. E non se miden a hora de poñer en marcha novos mecanismos para meternos o medo no corpo e lograr así que non nos enfrontemos abertamente as súas decisións políticas, como as multas impostas a sindicalistas na Mariña lucense ou a representantes públicos do BNG na Coruña.      

A semana pasada o ministro de educación, o xa famoso Wert, saíu anunciando que para obter unha bolsa de estudos na universidade haberá que ter unha nota media como mínimo de 6,5. E cubriuse de novo de gloria ao afirmar que se alguén procedente dunha familia humilde non é quen de chegar a esa nota media será porque non está ben orientado educativamente. É dicir, que se es rico e non chegas ao 6,5 non pasa nada, podes seguir cursando a titulación que queiras, pero se es pobre entón debes pasar ao pelotón dos burros e desempregados porque non tes capacidade para estudar o que decidiche. Clasismo en estado puro. Agora que pretenden convencernos de que non existe a loita de clases vemos como esta está tan presente coma sempre na sociedade. Porque ao que estamos asistindo é a unha verdadeira loita de clases, á eterna loita dos ricos contra os pobres. Outra volta de torca que nos queren aplicar para que o día a día sexa cada vez máis duro e para que cada vez teñamos menos dereitos.      

A isto hai que sumarlle o que está a pasar coas declaracións da patronal, que considera que catro días de permiso por falecemento dun familiar directo son un verdadeiro dispendio e que todos podemos pagar un avión para ir ao enterro dos nosos pais ou dos nosos fillos. Está claro que para estes señores a dor e o sufrimento son cousa de pobres, tamén no caso da morte de quen máis che importan. Será porque a eles só lles importa enriquecerse a conta do traballo dos demais.        

E para que todo isto pase desapercibido, a pesar da extrema gravidade que ten, empregan vías de ocultación máis que evidentes. O macroxuizo aos mozos galegos na Audiencia Nacional por terrorismo pon en evidencia a política ficción que aplican desde a dereita. Pretenden convencernos de que o gran problema galego é a violencia exercida con bombas e non a violencia exercida polos gobernos do PP na Xunta e no Estado e pola Troika europea. Mentres a televisión e a radio pública galega asimilan a Resistencia Galega con ETA e co terrorismo islamita, a realidade é que o terrorismo é o que aplican desde os distintos ámbitos de poder deixando á xente sen recursos e sen mecanismos públicos para sobrevivir.      

Ocultación da realidade e fanatismo político é o que nos presentan cada día os máximos dirixentes do PP. E a este fanatismo súmase cando lle convén o PSOE, como no caso do famoso pacto de política europea, ao que tamén se subiron outras forzas políticas e non só as estatais. Reúnense todos, xuntos ou por separado, para falarnos de que hai que corrixir a deriva europea pero finalmente o que fan é acatar e aplicar os mandatos da Troika, primeiro uns e agora outros, e sempre coa colaboración entusiasta dos correspondentes brazos sindicais, CC.OO e UGT. Todos eles teñen a mesma política económica, a que manda a Troika. Afondan aínda máis nas políticas neoliberais para enriquecer máis aos máis ricos. Ese é o seu acordo, o único ao que lles interesa chegar e do que o BNG se desmarcou completamente por ser totalmente lesivo para o noso país.        

E como xa dixen ao comezo, para que non nos movamos, agora tamén recorren a sancións económicas co afán de facernos calar, pero non o van lograr. Imos seguir na batalla para parar os desafiuzamentos, a privatización da sanidade, para que devolvan os cartos roubados ao pobo nas preferentes,... e para sacar á luz todos os problemas deste País.     



[01-07-2013 10:17] Bruno Panetta comentou:

Mi dispiace vedere come dalla BNG armati politico restituisce al tempo di BNPG con una posizione ambigua su azioni. Se la BNG vuole fare un salto di qualità nella loro lotta politica e organizzare un "Brigate Rosse", cioè che guidarla. Ma sembra politicamente incoerenza andare dietro una strategia politica non condivisa dal nazionalismo galiziano della BNG finora.

Engade o teu comentario:

Os campos marcados con* son obrigatorios.







© Fundación Bautista Álvarez de Estudos Nacionalistas
Terra e Tempo (ISSN 1575-5517)
Avenida de Lugo, 219, 1º, 15703 • Santiago de Compostela • Galiza
981 57 02 65 – info#code#terraetempo#code#gal

A Fundación recibiu unha axuda da Deputación da Coruña na convocatoria de 2018 para a mellora da utilidade de páxina web. Deputación da Coruña